Loni : संत सखाराम महाराज मंदिरात विधिवत पूजा अर्चना आरती झाल्यावर संतश्रेष्ठ श्री सखाराम महाराजांचे दर्शन घेऊन भक्तांनी प्रसादाचे सेवन केले.

Loni : श्री क्षेत्र लोणी यात्रेत भक्तांची मांदीयाळी…..

संतश्रेष्ठ श्री सखाराम महाराजांच्या 146 व्या पुण्यतिथी निमित्त महाराजांच्या समाधीचे दर्शन घेण्यासाठी श्री श्रेत्र लोणी येथे भक्तांचा जनसागर उसळला असून भाविक भक्तांनी शांततेत संत सखाराम महाराजांचे दर्शन घेऊन प्रसादाचा लाभ घेतला. वाशिम जिल्ह्यातीलच नव्हे तर विदर्भ व मराठवाडयातील लाखो भक्तांचे श्रद्धास्थान असलेल्या संत श्रेष्ठ श्री सखाराम महाराज श्री क्षेत्र लोणी येथे यात्रा महोत्सव सुरु झाला आहे. रोषणाई आणि भरगच्च बाजारपेठने लोणी परिसर फुलून गेला आहे. (Loni)

वाशिम जिल्हातील रिसोड तालुक्यातील लोणी येथे 30 नोव्हेंबर 2024 रोजी संतश्रेष्ठ श्री सखाराम महाराजांची पुण्यतिथी व महापंगत संपन्न झाली. यावेळी आयुष व आरोग्य केंद्रिय मंत्री खा. प्रतापराव जाधव, मेहकर विधानसभा माजी आमदार डॉ.संजय रायमुलकर, श्री शिवाजी शिक्षण संस्था सचिव प्रकाशराव मापारी, शिवसेना जिल्हाप्रमुख प्रा. बळीराम मापारी, शिवछत्र मित्र मंडळ संस्थापक अध्यक्ष नंदकिशोर मापारी, कल्याण महाराज जोशी, पांडुरंग मुंढे, अरुण गीते, राजू सानप आदी उपस्थित होते. संत सखाराम महाराजांच्या दर्शनासाठी विदर्भ तसेच मराठवाड्यातून लाखोच्या संख्येने भक्तांनी गर्दी केली. लोणी येथील रस्ते भक्तांच्या गर्दीने फुलून गेले होते. Lonar News YouTube Channel

संत सखाराम महाराज मंदिरात विधिवत पूजा अर्चना आरती झाल्यावर संतश्रेष्ठ श्री सखाराम महाराजांचे दर्शन घेऊन भक्तांनी प्रसादाचे सेवन केले. संत सखाराम महाराजांच्या महाप्रसाद मध्ये पुरीला अनन्य साधारण महत्व असून हा पुरीचा प्रसाद भक्त घरी नेऊन आपल्या धान्याच्या कोठारात किंवा पैशाच्या तिजोरीत ठेवतात. धान्याला बरकत येते, वैभव प्राप्त होते अशी भाविकांची यामागे धारणा असल्याचे सांगण्यात येते. या महोत्सवादरम्यान भक्तांची गैरसोय होणार नाही याची विशेष काळजी घेतली गेली. शेकडो स्वयंसेवकानी महाप्रसाद वितरणासाठी श्री चरणी सेवा दिली. (Loni)

लोणी यात्रेतील रथोत्सवाचे यंदा शंभरावे वर्ष

संत सखाराम महाराज यात्रेला शतकोत्तर परंपरा  रविवारी शताब्दी रथोत्सव

विदर्भ व मराठवाड्याच्या सीमेवरील जगप्रसिद्ध लोणार सरोवराच्या नजीक असलेले वाशिम जिल्ह्यातील लोणी हे गाव श्री संत सखाराम महाराजांच्या संजीवन समाधीमुळे लाखो भक्तांचे श्रद्धास्थान झाले आहे. संत सखाराम महाराजांनी कार्तिक वद्य चतुर्दशी 23 नोव्हेंबर 1878 रोजी समाधी घेतली. या समाधीदिनी दरवर्षी लोणी येथे यात्रा भरते. विदर्भातील सर्वांत मोठ्या या यात्रेला यंदा 146 वर्षे झाली असून, या यात्रेचे मुख्य आकर्षण असलेल्या रथोत्सवाला यंदा 100 वर्षे पूर्ण होत आहेत. येत्या 1 डिसेंबर 2024 रोजी हा शताब्दी रथोत्सव सोहळा साजरा होत आहे. सखाराम महाराजांचा जन्म मराठवाड्यातील जालना जिल्ह्यातील तळणी गावात झाला. त्यांनी लोणी येथे समाधी घेतली. तेव्हापासून लोणी गावाची ओळख महाराजांच्या नावाने राज्यभर झाली आहे. विदर्भ व मराठवाडा अशा दोन्ही विभागातील महाराजांच्या भक्तांची यात्रेला मोठी गर्दी उसळते. (Loni)

अशी आहे रथोत्सवाची परंपरा…..

मार्गशीर्ष शुद्ध प्रतिपदेला दुपारी श्रीच्या रथाची मिरवणूक निघते. याची सुरुवात शके 1847 म्हणजे इ.स. 1925 पासून झाली. नामदेव पांचाळ या कारागिराने परभणी येथे तीन मजली प्रचंड रथ तयार केला व त्याचे सुटे भाग पंचवीस बैलगाड्यांतून लोणी येथे आणले व रथ उभा केला. रथाचे वैशिष्ट्य म्हणजे त्याचे सुटे भाग नटबोल्टने एकमेकास जोडलेले आहेत. दरवर्षी कार्तिक वद्य 12 ला हा रथ समारंभपूर्वक रथगृहाच्या बाहेर आणला जातो. रथ तीन मजली असून, प्रत्येक खांब व कमानीवर सुंदर कोरीव काम केलेले आहे. दुपारी 2 ते 4 च्या दरम्यान रथाची मंदिराभोवती परिक्रमा होते. (Loni)

रथाला दोरखंड जोडून शेकडो भक्त हाताने रथ ओढतात. रथाची गती कमी करण्यासाठी किंवा त्याची दिशा बदलण्यासाठी चाकाखाली पहारी (लोखंडी कांब) लावतात, हे कार्य आंबा, परतूर, रामतीर्थ, बाबुलतारा, आदी मराठवाड्यातील गावचे वारकरीभक्त यांच्याकडे वंशपरंपरागत चालू आहे. चार पहारधारी रथाखाली व चारजण बाहेर असतात. रथ चालू असताना ते एकमेकांकडे पहारी देतात. यंदाच्या वैभवशाली शताब्दी रथोत्सवानिमित्त भक्ताजनांमध्ये विशेष उत्साह असून रथ व ड्रोन द्वारे पुष्पवृष्टी करण्यात येणार आहे. (Loni)