Breaking Point 2025 लोणार सरोवर पर्यटन
जागतिक पर्यटन स्थळ लोणार सरोवर - अपेक्षा मोठ्या, काम मात्र अपुरेच ....
Point : पर्यावरण संवर्धनाच्या मुद्द्यावरही 2025 हे वर्ष संमिश्र ठरले. सरोवरातील वाढते प्रदूषण, कचरा व्यवस्थापनाचा अभाव आणि जैवविविधतेला निर्माण होणारा धोका याबाबत गंभीर चिंता व्यक्त करण्यात आली.
Point : 2025 मध्ये लोणार सरोवर पर्यटन: अपेक्षा मोठ्या, काम मात्र अपुरेच
किशोर मापारी, लोणार.
2025 हे वर्ष सरत असताना जागतिक पर्यटन स्थळ म्हणून ओळख असलेल्या लोणार सरोवराबाबत अनेक घोषणा, बैठका आणि आश्वासने दिली गेली. मात्र वर्षअखेरीस पाहता पर्यटन विकास आणि संवर्धनाच्या बाबतीत अपेक्षित ठोस बदल अद्यापही दिसून आले नसल्याचे चित्र आहे. 2025 यावर्षी देखील देश-विदेशातून पर्यटकांची संख्या वाढलेली असली तरी मूलभूत सुविधा अद्याप अपुऱ्याच असल्याचे अनेक पर्यटकांनी दिलेल्या प्रतिक्रियामधून उघड होत आहे. पर्यटक सोशल मिडीया मधून लोणार सरोवर बाबत कुतूहल व्यक्त करत असतांना येथील सोयी-सुविधा बाबत खंत ही व्यक्त करतांना दिसून येत आहे.
सरोवराकडे जाणारे रस्ते, पार्किंग व्यवस्था, स्वच्छता, पर्यटक माहिती केंद्र आणि सुरक्षा यंत्रणा याबाबत अनेक तक्रारी समोर आल्या. विशेषतः गर्दीच्या काळात नियोजनाअभावी पर्यटकांना मोठ्या अडचणींचा सामना करावा लागला. स्थानिक प्रशासनाचे नियोजन कुठेतरी कमी पडत असल्याची बाब यातून समोर येत आहे.
राजकीय व शासकीय पातळीवर लोणार सरोवराच्या विकासाबाबत अनेकदा चर्चा झाल्या. पर्यटन वाढीचे दावे करण्यात आले, निधी मंजुरीच्या घोषणा झाल्या; मात्र प्रत्यक्षात किती कामे पूर्ण झाली, यावर प्रश्नचिन्ह कायम राहिले. विरोधकांनी वर्षभर सत्ताधाऱ्यांवर टीका करत लोणार पर्यटन केवळ कागदावरच असल्याचा आरोप केला. मात्र काही फलित झालेले दिसत नाही. (Point)
पर्यावरण संवर्धनाच्या मुद्द्यावरही 2025 हे वर्ष संमिश्र ठरले. सरोवरातील वाढते प्रदूषण, कचरा व्यवस्थापनाचा अभाव आणि जैवविविधतेला निर्माण होणारा धोका याबाबत गंभीर चिंता व्यक्त करण्यात आली. तरीही ठोस उपाययोजना राबविल्या गेल्या नाहीत, अशी नागरिकांची भावना आहे.
वर्षअखेरीस नागरिक, पर्यटक आणि निसर्गप्रेमींची एकच अपेक्षा आहे—2026 मध्ये लोणार सरोवरासाठी केवळ आश्वासन नव्हे, तर प्रत्यक्षात दिसणारा विकास व्हावा. स्वतंत्र पर्यटन विकास प्राधिकरण, स्थानिक युवकांना रोजगार, आणि सरोवराचे पर्यावरणीय संरक्षण हीच आता काळाची गरज असल्याचे स्पष्ट झाले आहे. (Point)
पर्यावरण संवर्धन केवळ चर्चेतच?
सरोवरातील प्रदूषण, कचरा व्यवस्थापन आणि जैवविविधतेच्या संरक्षणाचा मुद्दा 2025 मध्ये वारंवार उपस्थित झाला. मात्र ठोस कृती आराखडा प्रत्यक्षात उतरल्याचे चित्र दिसून आले नाही.
स्थानिक युवकांना रोजगाराची संधी कधी?
पर्यटन वाढ असूनही स्थानिक युवकांना मार्गदर्शक, सेवा, व्यवसायाच्या संधी मर्यादितच राहिल्या. स्थानिक रोजगार निर्मितीची मागणी वर्षअखेरीस पुन्हा एकदा जोर धरू लागली आहे.
वर्षअखेरची अपेक्षा
2026 मध्ये घोषणा नव्हे, प्रत्यक्ष विकास हवा
स्वतंत्र लोणार पर्यटन विकास प्राधिकरण, पर्यावरण संरक्षण, आधुनिक सुविधा आणि स्थानिक सहभागातून पर्यटन विकास—हीच आता नागरिकांची ठाम अपेक्षा असल्याचे 2025 च्या अखेरीस स्पष्ट झाले आहे.
